Հավաստի լրատվություն
Առավոտը կանգառ իջնելիս տեսա իմ հարևան Վաղոյին, որ ինչ-որ տեղ էր շտապում:
– Ո՞ւր ես գնում, Վաղո:
– Պիտի մտնեմ էն խանութը՝ այսօրվա լուրերը կարդալու:
– Խանութում ի՞նչ լուր պիտի կարդաս:
– Արի՝ կտեսնես:
Մտածեցի՝ անվերջ կորուստներից խենթացել է, այնուամենայնիվ հետևից մտա խանութ: Մոտեցավ մրգերի ու բանջարեղենի բաժնին, ուշադիր նայեց ու գոչեց.
– Փա՛ռք Աստծո, Մեղրին դեռ մերն ա:
– Ի՞նչ իմացար:
– Տես՝ գրված ա ,,Մեղրիի կառալյոկ,,: Տեսքից երևում ա, որ էսօր են բերել:
– Այ քեզ լրատվություն…
– Հազա՛ր փառք ու պատիվ:
– Ի՞նչ տեսար:
– Գորիսն էլ ա մերը:
– Էդ ո՞նց:
– Խնդրեմ, գրված ա ,,Գորիսի լոբի,,: Էրեկ չկար, հաստատ էսօր են բերել:
– Սպասի հլը, Վաղո:
– Ի՞նչ կա:
– Ոնց որ Բաղդադն էլ ա մերը:
– Ի՞նչ Բաղդադ:
– Տես՝ էն անկյունում գրված ա ,,Բաղդադի խուրմա,,:
– Էդ անկյունի հետ գործ չունես:
– Ինչո՞ւ:
– Էդտեղ միջազգային լրատվությունն ա: Դու տեղական լուրերը կարդա:
Կարո Վարդանյան
84 դիտում