ՄԱԿ-ում Պակիստանի ներկայացուցիչը հանդես է եկել հօգուտ Պաղեստինի
Պակիստանը ՄԱԿ-ին կոչ է արել վերանայել կազմակերպությանը միանալու Պաղեստինի հայտը, որը ապրիլին արգելափակվել էր ԱՄՆ-ի կողմից:
«ՄԱԿ-ը պետք է վերանայի Պաղեստինի ընդունումը, որպեսզի վերացնի Պաղեստինի ժողովրդի դեմ պատմական անարդարությունները», – ասվում է ՄԱԿ-ում Պակիստանի մշտական ներկայացուցիչ Մունիր Աքրամի հայտարարության մեջ:
Նրա խոսքով, Պաղեստինին զրկում են ՄԱԿ-ի լիիրավ անդամ դառնալու օրինական իրավունքից, մինչդեռ նա լիովին համապատասխանում է դրա բոլոր չափանիշներին։ «Մերձավոր Արևելքում խաղաղություն հաստատելու դիվանագիտական ջանքերը զգալի խթան կստանան, եթե ՄԱԿ-ի Անվտանգության խորհուրդը քվեարկի Պաղեստինին համաշխարհային կազմակերպության կազմում ընդունելու օգտին», – ասել է Պակիստանի մշտական ներկայացուցիչը:
Աքրամը ՄԱԿ-ին և միջազգային հանրությանը կոչ է արել անհապաղ հրադադար ապահովել Գազայի հատվածում և մարդասիրական օգնության անսահմանափակ հասանելիություն նրա խաղաղ բնակիչներին, կանխել հակամարտության հետագա սրումը, վերսկսել խաղաղ գործընթացը և պատասխանատվության ենթարկել Իսրայելին ռազմական հանցագործությունների և մարդկության դեմ հանցագործությունների համար:
Ապրիլին ԱՄՆ-ն օգտագործեց իր վետոյի իրավունքը ՄԱԿ-ի Անվտանգության խորհրդում և արգելափակեց Պաղեստինին համաշխարհային կազմակերպության լիիրավ անդամ ընդունելու մասին Ալժիրի բանաձևի նախագիծը։ Փաստաթղթին կողմ են քվեարկել Անվտանգության խորհրդի 12 անդամներ, այդ թվում՝ Ռուսաստանը և Չինաստանը, Շվեյցարիան և Մեծ Բրիտանիան ձեռնպահ են մնացել:
23 դիտում