Իրավապահ համակարգը Փաշինյանի ձեռքին պատժիչ գործիք է դարձել հայրենիքի համար պայքարող քաղաքացիների դեմ. Հայկ Նահապետյան
Իշխանություններին այլևս ոչինչ չի մնացել, քան իրականացնել ապօրինություններ, հատկապես, Տավուշում քաղաքացիական ակտիվություն հանդես բերող անձանց, այդ թվում նաև պահեստազորի գնդապետ Միհրան Մախսուդյանի, նրա ընտանիքի անդամների դեմ: Այս մասին HayqNews.am-ի հետ զրույցում ասաց ռազմական փորձագետ Հայկ Նահապետյանը:
«Միհրան Մախսուդյանի որդի՝ Վահագն Մախսուդյանին երկու ամսով կալանավորեցին խուլիգանության հոդվածով: Չնայած տեսանյութ կա, որտեղ Տավուշի ԵԿՄ մեքենան, երբ հավաքված մարդկանց վրա է շարժվում, նաև վնասվում է Վահագնի ոտքը, սակայն նա մեղադրվում է ապակի կոտրելու մեջ, որն իրականության հետ կապ չունի: Նույնը Միհրան Մախսուդյանի նկատմամբ է արվում. հիմա երկու դրվագով քննություն է գնում, նաև դեռահասներ կան, որոնց նկատմամբ, ըստ տարածվող լուրերի, բռնություն է կիրառվել ոստիկանությունում, հիմա նրանց ևս կանչել են քննչական մարմիններ: Այնպես որ, իշխանություններին որևէ բան չի մնացել անելու, քան իրավապահ համակարգը գործի դնել, որը Փաշինյան Նիկոլի ձեռքին պատժիչ գործիք է՝ արդար ընդվզում և պահանջ ներկայացնող քաղաքացիների նկատմամբ»,- ասաց Նահապետյանը:
Հայրենիքի համար արդար պայքարի ելած մարդկանց կալանավորումը, մեր զրուցակցի խոսքով, փաստում է իշխանության հոգեվարքի մասին. «Իրենք փորձում էին տեղեկատվական տարբեր հոսքերով կեղծ տեղեկություններ տարածել, քաղաքականացնել այդ պայքարը, տարբեր խմբեր ուղարկել, այդ բոլորը բացահայտեցին և շատ արագ չեզոքացրեցին: Հաշվի առեք, որ և՛ Միհրանը, և՛ իր տղան, այդ տարածքները պաշտպանելու ժամանակ հարազատներ են կորցրել՝ պապ են կորցրել, հորեղբայր…
Իսկ հիմա, փաստորեն ապօրինի կերպով փորձ է արվում իրենց հայրենի տարածքներից մարդկանց դուրս բերել՝ ասելով, թե իբր դրանք Հայաստանի տարածք չեն»:
Տեսանյութը` ամբողջությամբ: