1212 փաստաբաններ հարկային խնդրահարույց կարգավորումների դեմ կոլեկտիվ հանրագիր են ներկայացրել կառավարությանը
1212 փաստաբանի կողմից ստորագրված հարկային խնդրահարույց կարգավորումների դեմ կոլեկտիվ հանրագիրն այսօր՝ հունվարի 17-ին, ներկայացվել է կառավարություն: Այս մասին տեղեկացրել են ՀՀ փաստաբանների պալատից՝ կից ներկայացնելով փաստաթուղթը:
Փաստաբանները շարունակում են բարձրաձայնել «Հայաստանի Հանրապետության հարկային օրենսգրքում փոփոխություններ կատարելու մասին» օրենքի առաջացրած խնդիրների մասին։
Արդեն իսկ ուժի մեջ մտած կարգավորումներով փաստաբանական ծառայություններ մատուցող՝ շրջանառության հարկ վճարողներին պարտադրվում է անցնել հարկման ընդհանուր համակարգ (վճարել ԱԱՀ և շահութահարկ), ինչպես նաև փաստաբանական գրասենյակների կողմից անվճար հիմունքներով մատուցվող ծառայությունները ենթարկվում են հարկման ավելացված արժեքի հարկով:
Փաստաբանական ծառայություններ մատուցող կազմակերպությունների և անհատ ձեռնարկատերերի կողմից վճարման ենթակա հարկը փաստացի բարձրացել է 6-8 անգամ (5 տոկոս շրջանառության հարկի փոխարեն հարկվում են ավելացված արժեքի հարկով (ԱԱՀ) (դրույքաչափը՝ 20 տոկոս) և շահութահարկով (դրույքաչափը՝ 18-23 տոկոս)։
Փաաստաբաններն ընդգծում են՝ օրենքի կիրառման հետևանքով Հայաստանի Հանրապետության իրավաբանական օգնության համակարգը, որի առանցքային դերակատարներից է փաստաբանական ինստիտուտը, ենթարկվում է ոչ իրավաչափ և չհիմնավորված ճնշման: