Մոլդովայի իշխանությունն ընտրողներին կոչ է անում անտեսել «ֆեյք» հաղորդագրությունները

Մոլդովայի իշխանություններն ընտրությունների երկրորդ փուլի նախօրեին ընտրողներին կոչ են անում անտեսել գործող նախագահ Մայա Սանդուի օգտին քվեարկելու համար գումար խոստացող «ֆեյք հաղորդագրությունների և զանգերի զանգվածային գրոհը»:

Ըստ իշխանությունների, ընտրողները զանգվածաբար էլեկտրոնային փոստով նամակներ են ստանում, որոնք հորդորում են փողի դիմաց քվեարկել եվրոպամետ Սանդուի օգտին: Քաղաքացիներին նաև զանգահարում են՝ խոստանալով 1500 լեյ (մոտ 84 դոլար) Սանդուի օգտին տրվելիք քվեի համար: Երեկ մի քանի ժամում հազարավոր նման դեպքեր են գրանցվել, հաղորդում են իրավապահները:

Ոստիկանությունը հայտարարել է, որ բացահայտել է հեռախոսահամարն ու երկիրը, որտեղից կատարվում են զանգերը, և զբաղվում է էլեկտրոնային փոստով նամակների ծագման վայրը պարզելով:

Այդ փաստերի մասին իրավապահներին իրազեկել է և դրանք դատապարտել է հենց Սանդուի կուսակցությունը:

Մոլդովայում ընտրությունների երկրորդ փուլը վաղն է, դրանում մրցակցում են Սանդուն և ռուսամետ համարվող թեկնածու Ալեքսանդր Ստոյանոգլոն: